Tuesday, July 3, 2012
អាវភ្លៀង អំណាយសម្តេចតេជោ និងលោកជំទាវ ត្រូវបានផ្តល់ជូនកងកម្លាំង នៅជួរមុខ ទិសយោធភូមិភាគទី៣
លោកឧត្តមសេនីយ៍ឯក គីម ប៊ុនថាន នាំយកអាវភ្លៀង អំណាយសម្តេចតេជោនិងលោកជំទាវ ទៅផ្តល់ជូនកងកម្លាំងនៅជួរមុខទិសយោធភូមិភាគទី៣
កោះកុង: នៅទីបញ្ជាការវរសេនាតូចលេខ២ កោះយ៉ ចំណុះកងពលតូចលេខ៣១ ដែលមានទីតាំងស្ថិតនៅក្នុងភូមិសាស្ត្រស្រុកមណ្ឌលសីម៉ា ខេត្តកោះកុង នៅសៀលថ្ងៃទី៣ ខែកក្កដា ឆ្នាំ២០១២ បានរៀបចំពិធីប្រគល់អាវភ្លៀងអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជានិងលោកជំទាវគតិព្រឹទ្ធបណ្ឌិត ប៊ុន រ៉ានី ហ៊ុន សែន ដល់កងកម្លាំង ដែលកំពុងឈរជើងការពារបូរណភាពទឹកដី នៅទិសយោធភូមិភាគទី៣ ក្រោមអធិបតីភាព លោកឧត្តមសេនីយ៍ឯក គីម ប៊ុនថាន នាយករងខុទ្ធកាល័យសម្តេចតេជោ ហ៊ុន សែន និងជាអគ្គមេបញ្ជា ការរងនៃកងយោធពលខេមរភូមិន្ទ និង មានការអញ្ជើញចូលរួមពីនាយទាហាន នាយនគរបាល ជាន់ខ្ពស់ ក្នុងជួរគណៈបញ្ជាការសមរភូមិទិសយោធភូមិភាគទី៣។
មានប្រសាសន៍សំណេះសំណាលនាឱកាសនោះ លោក ឧត្តមសេនីយ៍ឯក គីម ប៊ុនថាន ក្នុងនាមលោកនាយឧត្តមសេនីយ៍ គន់ គីម បានពាំនាំនូវការផ្តាំផ្ញើសាកសួរសុខទុក្ខពីសំណាក់សម្តេច តេជោ ហ៊ុន សែន និងលោកជំទាវគតិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះកងទ័ព ,កងនគរបាលជួរមុខកំពុងឈរជើងការពារទឹកដីតាមបន្ទាត់ព្រំដែននៅទិស យោធភូមិភាគទី៣ ដែលកន្លងមក បានធ្វើពលីកម្មគ្រប់បែបយ៉ាង អនុវត្តបានយ៉ាងម៉ឺងម៉ាត់នូវបទបញ្ជាដ៏មានប្រសិទ្ធភាពរបស់សម្តេចតេ ជោ ក្នុងសិទ្ធិស្វ័យការពារទឹកដីកន្លងមក។
លោកឧត្តមសេនីយ៍ ឯកបានបន្តថា ការផ្តល់អាវភ្លៀង ក្នុងខណៈពេលនេះគឺមានសារៈសំខាន់បំផុតស្របទៅនឹងពេលដែលរដូវវស្សានឹង ឈានចូលមកដល់។
លោកឧត្តមសេនីយ៍ឯក គីម ប៊ុនថាន បានផ្តាំផ្ញើដល់នាយទាហាន នាយទាហានរង និង ពលទាហាន និងកងនគរបាលទាំងអស់ ត្រូវមានការប្រុងប្រយត្ន័ជានិច្ច និងគ្រប់គ្រងកម្លាំងឲ្យបានល្អ ថែរក្សាទុកដាក់នូវអាវុធយុទ្ធភណ្ឌ និងគ្រឿងបំពាក់នានាឲ្យបានត្រឹមត្រូវតាមលក្ខណៈបច្ចេកទេស ជីកលេណដ្ឋានឲ្យបានរឹងមាំ និងត្រូវខឹតខំហ្វឹកហ្វឺនលើគ្រប់មុខជំនាញ ដើម្បីឲ្យក្លាយជា កងទ័ព, កងនគរបាលអាជីព មានសមត្ថភាពគ្រប់គ្រាន់ នៅក្នុងការបំពេញភារកិច្ចការពារជាតិមាតុភូមិ។
ទន្ទឹមនឹង នោះដែរ ក៏ត្រូវយកចិត្តទុកដាក់ក្នុងការកសាង និងពង្រីកជីវភាពគ្រួសារតាមរយៈការដាំដំណាំគ្រប់ប្រភេទ និងចិញ្ចឹមសត្វ ដើម្បីលើកកំពស់ជីវភាពរស់នៅប្រចាំថ្ងៃឲ្យកាន់តែប្រសើរ ឡើងថែមទៀត។
ក្នុងនាមនាយទាហាន នាយទាហានរង ពលទាហាន និងកងកំលាំងនគរបាល ដែលឈរជើងយ៉ាងរឹងមាំនៅតាមបណ្តោយព្រំដែនជួរមុខទិសយោធភូមិភាគទី៣ ទាំងមូល សូមគោរពថ្លែង អំណរគុណយ៉ាងជ្រាលជ្រៅជាទីបំផុត ជូនចំពោះសម្តេចអគ្គមហាសេនាបតីតេជោ ហ៊ុន សែន និង លោកជំទាវគតិព្រឹទ្ធបណ្ឌិត ដែលបានឧបត្ថម្ភអាវភ្លៀងដល់កងទ័ព, កងនគរបាល សំរាប់ត្រៀម លក្ខណៈមុនពេលរដូវរភ្លៀងចូលមកដល់។ ការជួយឧបត្ថម្ភនេះ គឺមានជារៀងរាល់រដូវកាល គឺរដូវភ្លៀងផ្តល់អាវភ្លៀង និង រដូវរងារផ្តល់អាវរងារបន្ថែមលើការជួយឧបត្ថម្ភគ្រឿងបំពាក់ដល់កងទ័ព មានគ្រប់លទ្ធភាព និងគ្រប់សមត្ថភាពប្រយុទ្ធ ជួយដល់ការកសាងផ្លូវគមនាគមន៍ ផ្លូវចល័តខ្វាត់ខ្វែង តាមព្រំដែន ជួយកសាងភូមិឃុំអភិវឌ្ឍន៍ កសាងអគារស្នាក់នៅ អគារទីបញ្ជាការ ផ្ទះគ្រួសារកងទ័ព ស្រះទឹក អណ្តូងទឹក ដីបង្កបង្កើនផល មានមន្ទីរពេទ្យ សាលារៀន វត្តអារាម ធ្វើឲ្យកងទ័ពកាន់តែមានលំនឹងក្នុងការប្រយុទ្ធ និងត្រៀមប្រយុទ្ធអនុវត្តសិទ្ធិស្វ័យការពារទឹកដី។
កត្តា ទាំងនេះ គឺបានធ្វើឲ្យកងទ័ព និងកងនគរបាល ព្រមទាំងគ្រួសារនៅសមរភូមិមុខ និង ប្រជាពលរដ្ឋ ព្រះសង្ឃ តាមបណ្តោយព្រំដែនទាំងអស់ បានប្តេជ្ញាការពារនិងហ៊ានធ្វើពលីកម្មគ្រប់បែបយ៉ាង ក្នុងការការពារបូរណភាពទឹកដី និងគាំទ្រយ៉ាងពេញទំហឹងនូវបេក្ខភាពសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីនៃព្រះរាជាណាចក្រកម្ពុជា នៅអាណត្តិទី៥ និងអាណត្តិក្រោយៗទៀត ហើយបានចាត់ទុកលោកជំទាវគតិព្រឹទ្ធបណ្ឌិត ប៊ុន រ៉ានី ហ៊ុន សែន ជាបងស្រីម្នាក់ ជាមាតាម្នាក់ដ៏កក់ក្តៅ ព្រមទាំងគាំទ្រលោកជំទាវគតិព្រឹទ្ធបណ្ឌិតជាប្រធានកាកបាទក្រហមកម្ពុជា ជារៀងរហូត៕
ចក្រភពអង់គ្លេសមានកម្មវិធីនយោបាយ ជំរុញសេដ្ឋកិច្ចសហគមន៍អាស៊ានឲ្យកាន់តែរឹងមាំ
Give our kids a better deal
លោក Jeremy Browne អនុរដ្ឋមន្ត្រី នៃការិយាល័យការបរទេស នៃចក្រភពអង់គ្លេស ចូលរួមសម្ដែងការគួរសម និងពិភាក្សាការងារជាមួយសម្ដេចតេជោ នាយករដ្ឋមន្ត្រី ហ៊ុន សែន (រូបថត : ស៊ីវ ចាន់ណា)
ភ្នំពេញ: លោក Jeremy Browne អនុរដ្ឋមន្ត្រី នៃការិយាល័យការបរទេស នៃចក្រភពអង់គ្លេស បានចូលរួមសម្ដែងការគួរសម និងពិភាក្សាការងារជាមួយសម្ដេចតេជោ នាយករដ្ឋមន្ត្រី ហ៊ុន សែន កាលពីព្រឹកថ្ងៃទី៣ ខែកក្កដា ឆ្នាំ២០១២ នៅវិមានសន្តិភាព។
បន្ទាប់ពីបញ្ចប់ជំនួប លោក អ៊ាង សុផល្លែត ជំនួយការផ្ទាល់សម្ដេចនាយករដ្ឋមន្ត្រី បានមានប្រសាសន៍ប្រាប់ក្រុមអ្នករាយការណ៍ព័ត៌មានថា លោក Jeremy Browne ជម្រាប់ជូនសម្ដេចនាយករដ្ឋមន្ត្រីថា នេះជាដំណើរទស្សនកិច្ចលើកទី១ ក្នុងឆាកជីវិតរបស់លោកមកកាន់ព្រះរាជាណាចក្រកម្ពុជាយើង។ លោក Jeremy បានបញ្ជាក់ថា “ដំណើរទស្សនកិច្ចនេះ គឺជាផ្នែកមួយនៃកម្មវិធីនយោបាយរបស់ចក្រភពអង់គ្លេស ក្នុងការពង្រីក និងពង្រឹងទំនាក់ទំនងរវាងចក្រភពអង់គ្លេស និងកម្ពុជា ក៏ដូចជាទំនាក់ទំនងរវាងចក្រភពអង់គ្លេស និងតំបន់អាស៊ីអាគ្នេយ៍”។
លោក Jeremy Browne បានមានប្រសាសន៍ថា ចក្រភពអង់គ្លេសមានកម្មវិធីនយោបាយ ធ្វើការឲ្យកាន់តែជិតស្និទ្ធឡើងជាមួយនឹងតំបន់អាស៊ីអាគ្នេយ៍ទាំងមូល ដែលកំពុងមានទំនាក់ទំនងល្អ ធ្វើការជាមួយគ្នាមានភាពជិតស្និទ្ធ ជំរុញសេដ្ឋកិច្ច និងសហគមន៍អាស៊ានឲ្យកាន់តែរឹងមាំឡើង។
ក្នុងន័យនេះដែរ លោក Jeremy ក៏បានធ្វើការកត់សម្គាល់ថា នៅក្នុងព្រះរាជាណាចក្រកម្ពុជាយើង មានភាពអនុគ្រោះយ៉ាងខ្លាំងក្នុងការធ្វើធុរៈកិច្ច ដើម្បីឲ្យបានជាការទទួលជោគជ័យ។ លោកបានបន្តថា អ្វីដែលលោកស្វែងយល់នោះ គឺកម្ពុជាមានការងាយស្រួលក្នុងការធ្វើធុរៈកិច្ចទទួលជោគជ័យ ដោយមិនមានការិយាល័យធិបតេយ្យច្រើននោះឡើយ។
ជាការឆ្លើយតប សម្ដេចតេជោនាយករដ្ឋមន្ត្រី ហ៊ុន សែន បានសម្ដែងនូវការស្វាគមន៍ និងសម្ដែងនូវក្ដីរីករាយយ៉ាងខ្លាំង ចំពោះកម្មវិធីនយោបាយរបស់ចក្រភពអង់គ្លេស។ សម្ដេចក៏បានមានប្រសាសន៍ផងដែរថា ទំនាក់ទំនងរវាងប្រទេសយើងទាំងពីរ តាមរយៈកម្មវិធីនយោបាយនេះ នឹងមានការរីកចម្រើន ហើយជាងនេះទៅទៀត ពាណិជ្ជកម្ម វិនិយោគ និងទេសចរណ៍របស់ចក្រភពអង់គ្លេស មកកាន់កម្ពុជា សម្ដេចតេជោមានក្ដីសង្ឃឹមថា នឹងមានការរីកចម្រើន។ ឆ្លៀតក្នុងឱកាសនោះដែរ សម្ដេចនាយករដ្ឋមន្ដ្រី បានថ្លែងអំណរគុណជូនចំពោះចក្រភពអង់គ្លេសដែលកន្លងមក តែងតែផ្ដល់ជាជំនួយជួយដល់កម្ពុជា៕
តាមដានពត៏មានថ្មីៗ
កម្មករកាត់ដេរ បាតុកម្ម បិទផ្លូវជាតិលេខ៤ នៅជិតផ្សារបែកចាន ស្រុកអង្គស្នួល
(ថ្ងៃទី 4 កក្កដា 2012, ម៉ោង 09:55:AM) | ដោយ: រតនា
ខេត្តកណ្តាល: កម្មកររោងចក្រកាត់ដេរ តៃយ៉ាង ដែលមានទីតាំងស្ថិតនៅក្នុងស្រុកអង្គស្នួល ខេត្តកណ្តាល ជាង ៣.០០០ នាក់ ដឹកនាំដោយលោករ៉ុង ឈុន ប្រធានសហព័ន្ធសហជីពកម្ពុជា បានតវ៉ាបិទផ្លូវជាតិលេខ ៤ ម្តុំផ្សារបែកចាន នាព្រឹកម៉ោងប្រហែល ៨ ថ្ងៃទី៤កក្កដា ឆ្នាំ២០១២។ មកដល់ម៉ោងជាង ៩ព្រឹកនេះ កម្មករនៅតែបន្តឈរបិទផ្លូវ ដោយគ្មានដំណោះស្រាយ។
លោក រ៉ុង ឈុន ដែលចូលរួមតវ៉ាជាមួយនឹងកម្មករ បានឲ្យដឹងថា ការតវ៉ាឈរបិទផ្លូវជាតិលេខ៤ ដោយសារតែភាគីរោងចក្រកាត់ដេរ តាយ យ៉ាង បានចាក់មេក្រូរំខានដល់ការតវ៉ារបស់កម្មករនៅមុខរោងចក្រកាត់ដេរ។ កម្មកររោងចក្រកាត់ដេរ តាយ យ៉ាង ក៏ទាមទារនូវលក្ខខណ្ឌ ៥ ចំណុច រួមមាន ប្រាក់អត្ថប្រយោជន៍សម្រាប់កម្មករ ប្រាក់ថ្លៃធ្វើដំណើរ និងស្នាក់នៅ ១៥ ដុល្លារក្នុងមួយខែ ប្រាក់ថ្លៃទឹកដោះគោ សម្រាប់កម្មការិនី ដែលមានកូនខ្ចីចំនួន ១៥ ដុល្លារ ក្នុងមួយខែ ប្រាក់រង្វាន់ទៀងទាត់ ១៥ដុល្លារក្នុងមួយខែ និងទាមទារកុំឲ្យថៅកែរោងចក្រកាត់ប្រាក់ខែកម្មករ នៅពេលដែលពួកគេសុំច្បាប់ឈប់សម្រាកជាដើម។
លោក រ៉ុង ឈុន បន្តថា នៅថ្ងៃទី៥ ខែកក្កដា ឆ្នាំ២០១២ លោកនឹងដឹកនាំកម្មករ ដើរហែក្បួនចេញពីរោងចក្រកាត់ដេរ តៃយ៉ាង ទៅកាន់ការិយាល័យផ្ទះសម្តេចនាយករដ្ឋមន្ត្រី ហ៊ុន សែន ស្ថានទូតអាមេរិក និងសហគមន៍អឺរ៉ុប ដើម្បីស្វែងរកអន្តរាគមន៍។
ជុំវិញករណីនេះ លោកឧត្តមសេនីយ៍ត្រី អ៊ាវ ចំរើន ស្នងការនគរបាលខេត្តកណ្តាល បានឲ្យដឹងថា ក្រុមកម្មករប្រដាប់ដោយដំបង និងដុំថ្ម បានឈរបិទផ្លូវជាតិលេខ៤ នៅម្តុំផ្សារបែកចាន បណ្តាលឲ្យកកស្ទះចរាចរណ៍ជាង ២ គីឡូម៉ែត្រ។ កម្លាំងប៉ូលិសខេត្ត និងអភិបាលខេត្តកណ្តាល កំពុងចុះទៅអន្តរាគមន៍លើករណីនេះ។
លោកស្នងការបានបន្ថែមថា លោករ៉ុង ឈុន ដឹកនាំកម្មករធ្វើបាតុកម្មនេះ ដើម្បីតែបម្រើផលប្រយោជន៍គណបក្សប្រឆាំងប៉ុណ្ណោះ៕
សូមស្វាគមន៍: ជូនពរអោយមានសម្រស់ស្រស់ស្អាត ពីបង
សូមស្វាគមន៍: ជូនពរអោយមានសម្រស់ស្រស់ស្អាត ពីបង: ជូនពរអោយមានសម្រស់ស្រស់ស្អាត នឺង រៀនកាន់តែពូកែ ពីបងណា
Subscribe to:
Posts (Atom)